Samningurinn markar stór tímamót fyrir Loaloa þar sem um er að ræða fyrsta stóra innleiðingarsamning félagsins. Markmið samstarfsins er að samþætta myndskeið, skjöl og ljósmyndir Vegagerðarinnar í eitt miðlægt og leitanlegt kerfi sem mun nýtast starfsfólki í innra starfi, fyrir vef stofnunarinnar og aðra dreifingu.
Vegagerðin á sér ríka sögu sem nær áratugi aftur í tímann og gegnir lykilhlutverki í innviðauppbyggingu landsins. Starfseminni fylgir gríðarleg útgáfa á kynningarefni, skýrslum og rannsóknum, auk risastórs ljósmynda- og myndbandasafns sem fangar sögu og framgang íslenskra samgangna.
Sú staðreynd að gögnin hafa hingað til verið dreifð á ólík kerfi og netdrif hefur gert utanumhald og leit flókna. Þörfin á að tryggja varðveislu eldra efnis og einfalda aðgengi að því hefur því sjaldan verið brýnni.
Söguleg verðmæti og nútímatækni mætast
Með innleiðingu á tækni Loaloa verður dýrmætt efni flutt úr eldri kerfum og því komið fyrir í nútímalegu og öruggu skýjaumhverfi. Verkefnið verður unnið í markvissum áföngum og að lokum verður hið yfirgripsmikla safn Vegagerðarinnar að lifandi þekkingargrunni, sem gerir þessari merku stofnun kleift að nýta sögu sína og dagleg gögn á skilvirkari hátt en áður var mögulegt.